परळी :- वैद्यनाथ बँकेचे विद्यमान चेअरमन अशोक जैन यांना त्यांच्या परळी येथील निवासस्थानी
औरंगाबाद लाच लुचपत विभागाच्या अधिकाऱ्यांनी आज दुपारी धाड टाकत त्यांना १० लाख रुपयांची लाच घेतांना रंगेहाथ पकडले असुन या घटनेने मराठवाड्यातील सहकार क्षेत्रात एकच खळबळ उडाली आहे. या प्रकरणी परळी शहर पोलीस ठाण्यात गुन्हा दाखल करण्यात आला आहे.
भ्रष्टाचार प्रकरणी वैद्यनाथ बँकेचे चेअरमन अशोक जैन यांच नाव गेली दोन वर्षापासुन गाजत असुन
या बाबत अधिक माहिती अशी की वैद्यनाथ बँकेने कळंब येथील एका किराणा व्यापाऱ्याला अंदाजे अडीच कोटी रुपयाचे कर्ज मंजूर केले होते, या कर्जाच्या मोबदल्यात अशोक जैन यांनी किराणा व्यापाऱ्याकडे १५ लाख रुपयांची लाच मागितली होती . या 15 पैकी १० लाख रूपयांची लाच स्विकारत असताना जैन यांना आज त्यांचा परळी येथील निवासस्थानी औरंगाबाद येथील लाचलुचपत विभागाच्या अधिकाऱ्यांनी सापळा रचुन रंगेहाथ पकडले आहे. या प्रकरणी परळी पोलीस ठाण्यात जैन यांच्या विरोधात गुन्हा दाखल करण्यात आला असुन परळी शहर पोलीस पुढील तपास करत आहेत.