सहकारी संस्थांच्या निवडणुका तीन महिने पुढे- बाळासाहेब पाटील

संपूर्ण देशात महाराष्ट्राची कोरोना रुग्णसंख्या लक्षात घेऊन सहकारी संस्थाच्या निवडणुका  पुन्हा तीन महिने पुढे ढकलण्याचा निर्णय राज्य सरकारने घेतला असल्याची माहिती राज्याचे सहकार मंत्री बाळासाहेब पाटील यांनी दिली. देशातील कोरोनाचा वाढता प्रादुर्भाव लक्षात घेऊन या विषाणूचा संसर्ग राज्यात सर्वाधिक आहे. त्या अनुषंगाने सर्व सहकारी  संस्थाच्या निवडणूका १८ मार्च च्या शासन निर्णयानुसार तीन महिन्यासाठी पुढे ढकलण्यात आल्या होत्या.सध्याच्या कोरोना विषाणूमुळे उद्भवलेल्या गंभीर परिस्थितीचा विचार करता, कोरोना विषाणू संसर्ग टाळण्यासाठी शासनाने ३१ मे रोजीच्या आदेशान्वये राज्याचा लॅाकडाऊन कालावधी ३० जूनपर्यत वाढविण्यात आला आहे. तसेच अद्यापही साथीचा रोग आटोक्यात येण्यास काही अवधी लागणार आहे. त्याचप्रमाणे रुग्णांच्या संख्येत वाढ होत आहे.अशावेळी राज्यातील सहकारी संस्थांच्या  निवडणूका घेणे योग्य होणार नाही. म्हणून महाराष्ट्र सहकारी संस्था अधिनियम १९६० चे कलम ७३ कक मधील तरतुदी नुसार ज्या प्रकरणी  राज्यातील कोरोना या विषाणूचा वाढता प्रादुर्भाव बघता सहकारी संस्थाच्या निवडणुका  पुन्हा तीन महिने पुढे ढकलण्याचा निर्णय राज्य सरकारने घेतला असल्याची माहिती राज्याचे सहकार मंत्री बाळासाहेब पाटील यांनी दिली.