वसई विरार शहर महानगरपालिकेमधील वर्ग – ३ ची रिक्त पदे भरण्यासाठी लवकरच एजन्सी नेमणार

विरार - (मनीष गुप्ता) सन २००९ मध्ये वसई विरार शहर महानगरपालिकेची स्थापना झाली. स्थापनेनंतर ४ नगरपरिषदा व संबधीत ग्रामपंचायतीमधील कर्मचारी महानगरपालिकेत वर्ग करण्यात आले परंतु सदरचा कर्मचारीवर्ग अपुरा पडत असल्यामुळे सध्या ठेका पद्धतीने कर्मचारी नेमून त्याद्वारे कामकाज केले जात आहे. महानगरपालिकेच्या आकृतीबंधानुसार वर्ग ३ ची विविध संवर्गातील पदे महानगरपालिकेत रिक्त आहेत व ती पदे लवकरात लवकर भरणे अपेक्षित आहे. यासाठी महानगरपालिकेकडून वेळोवेळी प्रयत्न चालू होते. त्याच अनुषंगाने महानगरपालिकेमार्फत वर्ग – ३ च्या पदांची संगणक प्रणालीद्वारे भरती प्रक्रिया करणेकामी अनुभवी सक्षम यंत्रणा/अभिकर्त्याची (एजन्सीची) नेमणूक करण्यात येणार आहे. सक्षम यंत्रणा/अभिकर्ता(एजन्सी) नेमणे कामी महानगरपालिकेतर्फे ई-निविदा प्रक्रिया सुरु करण्यात आली असून एजन्सी नेमल्यानंतर सदर भरती प्रक्रिया पूर्ण करणेत येईल. नवीन भरती केल्याने महानगरपालिकेस स्वत:चा जबाबदार कर्मचारी वर्ग उपलब्ध होईल व त्यांचेवर जबाबदारी निश्चित होऊन महानगरपालिकेच्या कामाच्या दर्जात सुधारणा होईल.