NSCN-IM information wing para diya statement teh kuishie, Naga peace process tuh bishi monduk aru ekta "tipping point" teh punchi kena ase. Kile mane Rn Ravi para baar baar Naga issue opor teh biya akraman kuria tuh luyi kena. NSCN-IM para kuatuh, Rn Ravi para bridge ke juyi olayi dishie. Eneka samoy teh meeting point tuh kineka howo najana-a huishie. Ituh karne Rn Ravi ke hatayi kena alak manu ke Naga issue ke sawole diwi koi kena NSCN-IM para mangia ase.
Naga political issue tuh ja-a sal october moina teh kotha kuria khotom kurishie huilewi etia tak bhi formal deal tuh rukhia ase. Etia final agreement, New Delhi teh shuru howole umeed thakia samoy teh NSCN-IM aru Rn Ravi mun milawo napari kena interlocutor ke hatawole mangia ase. Etuh sal June moina teh Rn Ravi para Nagaland Chief Minister shri Neiphiu Rio ke letter likhia teh NSCN khan ke ARMED GANGS aru UNDERGROUND GROUPS koi kena matia karne bhi khushi napayi kena thakia ase.
1st September 2020 din teh Rn Ravi laga paksh sources para ituh news channel ke kuishie. Kintu naga manu khan Rn Ravi ke heh interlocutor thakiwole khushie ase kuishie. Rn Ravi September 2014 teh GOI aru Naga political peace talk laga mojo teh interlocutor appoint kurishie. Kintu 1997 sal para peace talk kotha kuri kena ahi thakia tuh eku progress nahoi kena thakishie. Rn Ravi laga paksh khan logo teh janiwo pa-a tuh muivah laga demand; India logoteh khali ekta treaty relation heh nahoi le kitia bhi India logo teh eki howole razi thakia nai aru Th. Muivah para Prime Minister level teh heh kotha kuria laga dawa kuri thakishie. Etu karne kitia nutun Prime Minister power teh ahiwo, jai kena lop pa-a pishie teh heh interlocutor ke lop payi kuishie. Hoilewi sources para kua tuh Rn Ravi para Th. Muivah ke August 2015 teh heh PM Modi ke lop pawole dishie kuishie. Tai framework agreement Indian Union mojo teh sign kuriwole zari howa pishie teh heh. Aruwi kuishie Rn Ravi para Naga manu laga apex stakeholders; Naga Tribal Bodies, Nagaland GB federation, Naga civil societies, Church leaders, aru Naga parosi khan sop ke milayi kena kotha kuriwole shuru kurishie kuishie. Etuh ekla nahoi kena Rn Ravi para sop Naga armed groups khan ke peace process teh milayi shie kuishie. Huilewi tate, alak stakeholders khan sop settlement karne razi hua pishie bhi Th. Muivah Naga separate flag aru alak constitution man-ngi thakia karne, Rn Ravi para October 31 2019 deadline tuh dishie. Ituh pishie Th. Muivah flag aru constitution ke charikena settlement ania pishie heh aru kutha kuriwole request bhi kurishie kuishie. Arubhi kuishie, etia laga samoy teh Th. Muivah aru tai laga sathi khan Naga manu tai khan ke bia pa-a tuh dikhi kena Rn Ravi ke heh golti kuria ase aru tai ke hatawole koshiesh teh ase kuishie. Kintu Naga manu khan NSCN-IM laga aadath para kushie napayi kena Rn Ravi ke heh interlocutor thakibhi aru joldi settlement anibhi kui ase koi kena ituh news channel ke kuishie.
Etia laga latest khobar ekta tuh, 1 September 2020 din Nagaland GB federation khan PM Modi ke petition letter likhi kena man-ngi shie, GOI ke kam teh masbhut thakibhi aru pura josh di kena joldi peace settlement signed kuriwole request kurishie. Naga Hoho nahoi lebhi NSCN-IM laga pressure tactics teh na giribhi koi kena PM Modi ke request kurishie. Aruwi shri SC Jamir tuh Naga Peace Convention laga akhri jivid member hoa karne tai laga witness tuh nutun agreement ke pavitar diwo pariwo aru 16 points of agreement ke bishi bal effects bhi thakiwo koi kena request dishie. Nagaland GB Federation khan ummed bhi jatayishie, PM Modi para Naga issue tuh joldi agee luyi jai kena final agreement tuh September 2020 teh heh kuri diwole.
Sudarshan News Channel para ituh news story file kuri thakia tak, ituh claimed sources opor teh NSCN-IM top brass khan logo teh comments lowo le koshish kurishie. Huilewi etia tak mumkin howole paria nai judi kotha punchiwo parile apni khan sop logo teh share kuriwo.