विकासकामांना निधी मिळण्यासंदर्भातील महाविकास आघाडी सरकारवर नाराज असणाऱ्या ११ आमदारांच्या संदर्भात उपमुख्यमंत्री अजित पवार यांनी हस्तक्षेप केल्यामुळे नाराज झालेल्या आमदार कैलास गोरंटय़ाल यांची उपमुख्यमंत्र्यांनी भेट घेतली.
आमदार गोरंटय़ाल यांच्या पत्नी जालना नगरपरिषदेच्या अध्यक्षा आहेत. नगरपरिषद काँग्रेसच्या ताब्यात असूनही निधी देताना महाविकास आघाडी सरकारमध्ये अन्याय होत असल्याची गोरंटय़ाल यांची तक्रार होती. त्यांच्यासह काँग्रेसच्या ११ आमदारांनी मुख्यमंत्री त्याचप्रमाणे नगरविकास मंत्र्यांच्या कानावर विकास निधीच्या संदर्भात आपले म्हणणे मांडले होते.
या संदर्भात आमदार गोरंटय़ाल यांनी सांगितले की, उपमुख्यमंत्री अजित पवार यांनी सोमवारी भ्रमणध्वनीवर संपर्क साधला होता. मंगळवारी त्यांनी भेट घेऊन संवाद साधला. जालना नगरपरिषदेच्या निधीबाबत होणारा अन्याय दूर करण्याचे आश्वासन त्यांनी यावेळी दिले.
काँग्रेसच्या अन्य नाराज आमदारांच्या संदर्भातही विकास निधीबाबत अन्याय होणार नाही, असे त्यांनी सांगितले. प्रदेश काँग्रेसचे अध्यक्ष बाळासाहेब थोरात आणि पक्षातील अन्य वरिष्ठ नेत्यांसोबतही आपण जालना नगरपरिषदेच्या विकास निधीबाबत चर्चा केली असल्याचेही गोरंटय़ाल यांनी सांगितले. दरम्यान आमदार गोरंटय़ाल यांच्याबरोबर उपोषणाच्या तयारीत असणारे आमदार कोण याचीही चर्चा राज्यभर सुरू आहे. नांदेड जिल्ह्य़ातीस काही आमदारही निधी वाटपावरून नाराज असल्याचे सांगण्यात येत आहे.