नांदेड, : नांदेड येथील हुजूर साहेब गुरुद्वारा परिसरात पोलिसांवर हल्ला झाला असून या हल्ल्यात चार पोलीस कर्मचारी जखमी झाले आहेत. जमावाने पोलीस अधीक्षकाच्या वाहनावर हल्ला करत गाडीची तोडफोड केली. दरवर्षी होळीच्या दिवशी गुरुद्वारातून हल्लाबोल मिरवणूक निघते मात्र सध्या कोविडच्या पार्श्वभूमीवर नांदेडमध्ये संचार बंदी आणि लॉकडाऊन लागू आहे. तेव्हा गर्दी करू नये असे जिल्हा प्रशासनाचे आदेश होते.
त्यामुळे गुरुद्वारा बोर्डानेदेखील ही मिरवणूक रद्द केली होती. मात्र सायंकाळी हल्ला बोल मिरवणुकीसाठी मोठ्या संख्येने गर्दी करण्यात आली आहे. पोलिसांनी त्यांना रोखण्याचा पर्यंत केला असता जमावाने पोलिसांवर हल्ला केला. यात चार पोलीस कर्मचारी जखमी झाले आहेत. या प्रकरणात आरोपीविरुद्ध कारवाई सुरू असल्याची माहिती पोलीस अधीक्षक प्रमोद शेवाळे यांनी दिली आहे. सध्या परिस्थिती नियंत्रणात असून पोलिसांनी मोठा बंदोबस्त या भागात लावला आहे.