नंदुरबारला पतंगीच्या वादातून एकाचा खून

   सुदर्शन  न्युज (केतन रघुवंशी ): नंदुरबार - येथील जुना बैलबाजार परिसरात दोन गट एकमेकांवर सशस्त्र चालून आल्यानंतर झालेल्या हाणामारीत एका इसमाचा मृत्यू झाला. खून आणि खुनाचा प्रयत्न यासंदर्भातील कलमान्वये एकोणीस जणांविरोधात शहर पोलिस ठाण्यात गुन्हा नोंद करण्यात आला आहे.
पोलिस सूत्रांनी दिलेल्या माहितीनुसार नंदुरबार शहरातील जुना बैलबाजार परिसरात पतंग उडवण्याच्या किरकोळ  कारणाने शनिवार दिनांक 12 सप्टेंबर रोजी सायंकाळी कुरेशी आणि पटवे परिवारात वाद झाला. यातूनच शहरुख कलीम पटवे आणि त्याचे 12 साथीदार लोखंडी पाइप रॉड दगड लाठ्याकाठ्या घेऊन कुरेशी परिवारावर चालून आले आणि जबर मारहाण केली. या मारहाणीत गंभीर जखमी झालेले हारुण युसुफ कुरेशी यांना उपचारार्थ दाखल केले असता त्यांचा मृत्यू झाला. या घटनेने अलीसा मोहल्ला आणि जुना बैलबाजार परिसरात रविवारी देखील तणाव होता. दरम्यान लियाकत शाहिद बागवान यांनी दिलेल्या फिर्यादीवरून शाहरुख पटवे आणि पटवे परिवारातील 12 सदस्या विरोधात खून केल्याचा तसेच खुनाचा प्रयत्न करण्याच्या आरोपाखाली गुन्हा नोंदवण्यात आला. याविरोधात कलीम शेख कासम पटवे यांनीसुद्धा दुसऱ्या बाजूने फिर्याद नोंदवली आहे या फिर्यादीनुसार अरबाज, सलीम आणि अन्य सात जणांविरुद्ध गुन्हा नोंदविण्यात आला आहे.