नंदुरबार दि. 26 : सार्वजनिक वितरण प्रणालीद्वारे धान्याचे मासिक वाटप करताना रास्तभाव दुकानदारांनी ई-पॉस यंत्राद्वारे शिधापत्रिकेतील लाभार्थ्यांच्या आधार व मोबाईल क्रमांकाची जोडणी (सिडींग) करावी. तहसील कार्यालयांनी जोडणी न झालेल्या लाभार्थ्यांची रास्तभाव दुकाननिहाय यादी तयार करून 31 जानेवारी 2021 पूर्वी जोडणी करण्याचे नियोजन करावे, असे निर्देश जिल्हाधिकारी डॉ.राजेंद्र भारुड यांनी दिले आहेत.
सार्वजनिक वितरण प्रणालीत पारदर्शकता आणण्यासाठी लाभार्थ्यांच्या आधार व मोबाईल क्रमांकाची जोडणी आवश्यक आहे. यासाठी रास्तभाव दुकानदार व पुरवठा निरीक्षक यांना आधार व मोबाईल सिडींगबाबत प्रशिक्षण देण्यात यावे. 31 जानेवारी पर्यंत लाभार्थ्यांच्या आधार व मोबाईल क्रमांकाचे सिडींग न झाल्यास त्यांना देण्यात येणारे धान्य पुढील महिन्यापासून आधार सिडींग होईपर्यंत निलंबित करण्यात येईल व याची जबाबदारी संबंधित तहसीलदार, पुरवठा निरीक्षण अधिकारी आणि पुरवठा निरीक्षकांची राहील, असे आदेशात नमूद करण्यात आले आहे.
सार्वजनिक वितरण प्रणालीच्या पात्र लाभार्थ्यांनी आपले आधार व मोबाईल क्रमांक सिडींग झाले नसल्यास रास्तभाव दुकानदारांशी संपर्क साधून सिडींग करून घ्यावे, असे आवाहन जिल्हा प्रशासनातर्फे करण्यात आले आहे.