पुण्यश्लोक अहिल्यादेवी होळकर याच्या जयंतीचे औचित्य साधून ठाणे व पालघर जिल्ह्यातील६० महिलांचा अहिल्यादेवी होळकर पुरस्काराने सन्मान

मुंबई,दि, ३१ :पुण्यश्लोक अहिल्यादेवी होळकर यांच्या जयंतीचे औचित्य साधून पुण्यश्लोक अहिल्यादेवी होळकर पुरस्कार आज ज्या महिलांना प्राप्त झाला आहे त्यांचे अभिनंदन करून या पुरस्कार प्राप्त महिलांनी यापुढेही सामाजिक क्षेत्रात असेच काम सुरू ठेवून योगदान द्यावे असे मत महिला व बालविकास मंत्री मंगलप्रभात लोढा यांनी व्यक्त केले.

सह्याद्री अतिथीगृह येथे ठाणे व पालघर जिल्ह्यातील प्रत्येकी १५ ग्रामपंचायतीं मधील ६० पुरस्कार विजेत्या महिलांचा सन्मान सोहळा पार पडला.या कार्यक्रमात महिला व बालविकास मंत्री मंगलप्रभात लोढा बोलत होते.यावेळी महिला व बालविकास विभागाच्या प्रधान सचिव आय. ए.कुंदन, सामाजिक कार्यकर्ता डॉ. स्मिता काळे बनगर, ठाणे व पालघर जिल्ह्यातील सरपंच,पुरस्कार प्राप्त महिला यावेळी उपस्थित होत्या. 
      
महिला व बालविकास मंत्री.मंगलप्रभात लोढा म्हणाले,पुण्यश्लोक अहिल्यादेवी होळकर यांच्या जयंतीचे औचित्य साधून या वर्षापासून ग्रामपंचायत स्तरावर, समाजिक क्षेत्रात योगदान देणाऱ्या दोन कर्तबगार महिलांचा ग्रामपंचायतस्तरीय पुण्यश्लोक अहिल्यादेवी होळकर पुरस्कार देऊन सन्मान करण्याचा निर्णय घेतलेला आहे.या पुरस्कारासाठी राज्यातील एकूण २७८९७ ग्रामपंचायतींमध्ये  सुमारे ५५,७९४ महिलांना पुरस्कार देवून आज गौरविण्यात आले आहे.महिला आज सामाजिक क्षेत्रात काम करण्यासाठी पुढे येत आहेत ही अत्यंत आनंदाची गोष्ट आहे. आज दिलेला पुरस्कारामुळे नव्याने सामाजिक क्षेत्रात काम करण्यासाठी महिला तयार होतील अशी मला आशा आहे असेही मंत्री मंगलप्रभात लोढा म्हणाले.