प्रतिनिधी दिपक चव्हाण पुणे
खेड तालुका अखिल भारतीय ग्राहक पंचायतीच्या वतीने गुरुवारी (दि. १९) राजगुरुनगर येथील प्रांत कार्यालयाबाहेर विविध प्रश्नांबाबत धरणे साखळी आंदोलन करण्यात आले. खेड तालुक्यात अनेक ठिकाणी बेकायदेशीर गौनखनिज उत्खनन चालू आहे. त्यातील काही ठिकाणी पंचनामे होऊनही दंडात्मक कारवाई होत नाही. खेड घाट बाह्यवळण येथे संगनमताने कामे चालू आहेत. त्यात महसूल विभागाची कारवाई संशयास्पद आहे. त्यामुळे आजपासून बेमुदत आंदोलन सुरू केले.
आंदोलना दरम्यान उपविभागीय अधिकारी विक्रांत चव्हाण यांनी आंदोलकांशी चर्चा केली. मात्र काही ठोस आश्वासन न मिळाल्याने आंदोलन सुरूच ठेवण्याचा निर्धार आंदोलकांनी केला असून उद्याही आंदोलन सुरूच राहणार आहे. याप्रसंगी जिल्हा उपाध्यक्ष अशोक भोर, तालुका अध्यक्ष देवानंद बवले, कोषाध्यक्ष अवधूत प्रसादे, सहसंघटक विठ्ठल दौंडकर, बबन गावडे, धनंजय देव्हरकर, अक्षता कान्हूरकर, उज्वला शेटे, संगिता मायदेव आदी उपस्थित होते.