नागपूर आंभोरा येथील वैनगंगा नदी पात्रातील बॅक वाॅटरमध्ये वाठोडा येथील एका दाम्पत्याने मुलीसह सामुहिक आत्महत्या केल्याची घटना रविवारी सकाळी ७.३० वाजता उघडकीस आली. श्याम गजानन नारनवरे (वय ४६), सवीता श्याम नारनवरे (वय ३५) व कु. समिता उर्फ समीक्षा श्याम नारनवरे (वय १२) अशी तीनही मृतकांची नावे आहे. हे दाम्पत्य वाठोडा येथील अनमोल नगरचे रहिवासी होते. श्याम नारनवरे हे संत जगनाडे महाराज कोआॅपरेटीव्ह सोसायटीत रोखपाल असल्याचे समोर आले आहे.
वैनगंगा नदी पात्रात रवीवारी सकाळी ७.३० वाजता ढिवर समाजाचे लोक मासेमारी करण्यासाठी गेले असता पुलावर त्यांना एक मोटरसायकल उभी दिसली. या मोटरसायकलला एक जॅकेट, एक लेडीज शाल व स्वेटर लटकलेले होते. तर गाडीच्या बाजूला कठड्यावर लेडीज चप्पल दिसली. ढिवरांनी पोलिस पाटलांना माहिती दिल्यानंतर त्यांनी वेलतूर पोलिसांना माहिती दिली. पोलिसांनी घटनास्थळ गाठून ढिवरांच्या मदतीने शोधाशोध सुरू केली असता दुपारी दीडच्या सुमारास आई व मुलीचा तर दोन वाजताच्या सुमारास वडीलांचा मृतदेह बाहेर काढण्यात आला. आईचे हात मुलीच्या कंबरेला ओढणीने बांधलेले होते. तर वडीलांचेही हात बांधलेले होते.
या प्रकरणी मृतक श्याम नारनवरे यांची बहिण ज्योती संजय धरत हीच्या तक्रारीवरून वेलतूर पोलिस ठाण्यात आकस्मिक मृत्यूचा गुन्हा दाखल करण्यात आला आहे. मृत्यूचे कारण अजून कळू शकले नाही.