सुदर्शन न्युज (केतन रघुवंशी ) नंदुरबार
नंदुरबार - खुनाच्या प्रकरणात आरोपी असलेल्या तरुणाने चाकूहल्ला करून दांपत्याला गंभीर जखमी केले. जखमी झालेले पती-पत्नी वडाळी प्राथमिक आरोग्य केंद्रात उपचार घेत आहेत, तर पोलीस फरार झालेल्या आरोपीचा शोध घेत आहेत. पोलिस सूत्रांनी दिलेल्या माहितीनुसार शहादा तालुक्यातील प्रवीण उर्फ आबा आधार कोळी या तरुणावर एका खून प्रकरणात गुन्हा नोंद आहे. त्या प्रकरणात शहादा तालुक्यातील काकर्दे येथील रहिवासी हेमंत दिलीप कोळी वय 34 यांनी दिलेल्या माहितीमुळे आपल्यावर तो गुन्हा नोंद झाला होता, असा समज प्रवीण कोळीने करून घेतला. त्या रागातूनच प्रवीण यांनी हेमंत कोळी आणि त्यांची पत्नी सुनिता कोळी वय 29 यांच्यावर चाकूने हल्ला केला. हेमंत यांच्या उजव्या काखेत घुसल्याने मोठी जखम झाली तर सुनिता यांच्या डोक्यावरही गंभीर जखम झाली. ग्रामस्थांनी ताबडतोब धावपळ करून वडाळी प्राथमिक आरोग्य केंद्रात त्यांना दाखल केले. दरम्यान हल्लेखोर प्रवीण कोळी फरार झाला. सारंग खेडा पोलीसांनी गुन्हा नोंदवला असून फरार आरोपीचा शोध पोलीस घेत आहेत.