पुणे: उपमुख्यमंत्री अजित पवारांच्या ताफ्याला मराठा समाजाने काळे झेंडे दाखवत निषेध व्यक्त केला. अजित पवार हे पुण्यातील जुन्नर विधानसभेचा दौरा करता आहे. यावेळी अहमदनगर - कल्याण महामार्गावरील आळे फाटा परिसरात हे आंदोलन करण्यात आलं. अजित पवारांनी मराठा समाजाला उद्देशून केलेल्या वक्तव्याचा निषेधार्ह हे झेंडे दाखवण्यात आले.
काल मनोज जरांगे यांना पाठिंबा दर्शवण्यासाठी करण्यात आलेल्या आंदोलनावेळी अजित पवारांनी हा दौरा रद्द करावा, अशी मागणी करण्यात आली होती. मात्र मराठा समाजाच्या या मागणीला झुगारून अजित पवार दौऱ्यावर आले, त्यामुळं मराठा समाज आक्रमक झाला. त्यांनी ताफ्याला काळे झेंडे दाखवत, आरक्षण मिळावं यासाठी घोषणाबाजी केली. पोलिसांनी आंदोलनकर्त्यांना ताब्यात घेतलं आहे.