'અમે ભારતને હરાવી શકતા નથી', જનરલ બાજવાના નિવેદનથી પાકિસ્તાનમાં ખળભળાટ

પાકિસ્તાનના ભૂતપૂર્વ આર્મી ચીફ જનરલ કમર જાવેદ બાજવાએ આખરે સ્વીકારી લીધું છે જેને સામાન્ય પાકિસ્તાનીઓ નકારી રહ્યા છે. જનરલ બાજવાએ કહ્યું હતું કે, પાકિસ્તાનની સેના ભારતીય સેના સામે ટકી રહેતી નથી. તેમની પાસે ભારત સામેના યુદ્ધ માટે દારૂગોળો અને આર્થિક શક્તિનો અભાવ છે. પાકિસ્તાની પત્રકાર હામિદ મીરે એક શોમાં જનરલ બાજવાના નિવેદનનો ઉલ્લેખ કર્યો હતો. હામિદ મીર અનુસાર, જનરલ બાજવાએ સ્વીકાર્યું હતું કે, પાકિસ્તાન ભારત સાથે યુદ્ધ કરી શકે નહીં. કમાન્ડર્સની કોન્ફરન્સ દરમિયાન જનરલ બાજવાએ પણ સ્વીકાર્યું હતું કે પાકિસ્તાન આર્મી ભારતીય સેના માટે કોઈ મેચ નથી. હામિદ મીરે પૂર્વ સેના પ્રમુખને ટાંકીને કહ્યું હતું કે, પાકિસ્તાની સેના ભારતીય સેના સામે લડવા સક્ષમ નથી.

હામિદ મીરે શો દરમિયાન કહ્યું હતું કે જનરલ બાજવાએ 2021માં ખુલાસો કર્યો હતો કે તેમણે ભારતના રાષ્ટ્રીય સુરક્ષા સલાહકાર અજીત ડોભાલ સાથે ગુપ્ત વાતચીત કરી હતી. તેમણે યુદ્ધવિરામની ઘોષણા પછી વડાપ્રધાન નરેન્દ્ર મોદીની પાકિસ્તાન મુલાકાતનું આયોજન કેવી રીતે કરવામાં આવ્યું તે વિશે પણ જણાવ્યું હતું.

આ પહેલા પાકિસ્તાન તહરીક-એ-ઈન્સાફ (PTI)ના પ્રમુખ ઈમરાન ખાને કહ્યું હતું કે ભૂતપૂર્વ આર્મી ચીફ કમર જાવેદ બાજવાએ ભારત સાથે મિત્રતા પુનઃસ્થાપિત કરવા માટે તેમના પર દબાણ કર્યું હતું. ઈમરાન ખાનને કહ્યું હતું કે, બાજવા ભારત સાથે મિત્રતા ઈચ્છે છે અને આ માટે તેમના પર દબાણ લાવે છે. બાજવા એક દિવસ કંઈક કહેતા હતા અને બીજા દિવસે પાછું ખેંચી લેતા હતા. તમને જણાવી દઈએ કે બંને પાડોશી દેશો વચ્ચે છેલ્લા ઘણા સમયથી સંબંધો વણસેલા છે. પાકિસ્તાને ન માત્ર રાજદ્વારી સંબંધોને ડાઉનગ્રેડ કર્યા પરંતુ ભારત સાથેના દ્વિપક્ષીય વેપારને પણ સ્થગિત કર્યો હતો. જો કે, 2021માં જ્યારે બંને દેશો બેકચેનલ વાટાઘાટોમાં વ્યસ્ત હતા ત્યારે સંબંધોમાં સુધારો થવાની આશા હતી.

સંયુક્ત આરબ અમીરાતમાં પાકિસ્તાન અને ભારતના વરિષ્ઠ સુરક્ષા અધિકારીઓ વચ્ચે ગુપ્ત બેઠકોને કારણે ફેબ્રુઆરી 2021 માં નિયંત્રણ રેખા (એલઓસી) પર યુદ્ધવિરામનું નવીકરણ કરવામાં આવ્યું હતું. આગળનું પગલું દ્વિપક્ષીય વેપારને પુનઃસ્થાપિત કરવાનું હતું, પરંતુ તત્કાલીન વડાપ્રધાન ખાનની સરકારે ભારતમાંથી ખાંડ અને કપાસની આયાત કરવાનો નિર્ણય નકારી દીધો ત્યારે પ્રક્રિયા અટકી ગઈ હતી. પાછળથી કેટલાક અહેવાલોમાં એવો દાવો કરવામાં આવ્યો હતો કે વડાપ્રધાન નરેન્દ્ર મોદીની પાકિસ્તાન મુલાકાતની શક્યતા પર પડદા પાછળની વાતચીતમાં પણ ચર્ચા કરવામાં આવી હતી.