राष्ट्रवादी काँग्रेसचे अध्यक्ष शरद पवार यांना रविवारी ब्रीच कॅण्डी रुग्णालयात दाखल करण्यात आलं होतं. पोटात दुखू लागल्याने शरद पवार यांची तपासणी केली असता पित्ताशयात खडे झाल्याचं निष्पन्न झालं आहे. तपासणी पूर्ण झाल्यानंतर त्यांना घरी पाठवण्यात आलं. बुधवारी त्यांच्यावर एन्डोस्कोपी करण्यात येणार असून त्यानंतर त्यांच्यावर शस्त्रक्रिया करण्यात येणार आहे.
यादरम्यान अनेकांनी शरद पवारांच्या प्रकृतीची चौकशी करत लवकर बरे व्हावेत यासाठी शुभेच्छा दिल्या. शरद पवारांनी ट्विट करत विचारपूस करणाऱ्या सर्वांचे आभार मानले आहेत. यामध्ये पंतप्रधान नरेंद्र मोदी यांचाही समावेश आहे. मोदींनीही शरद पवारांना फोन करुन प्रकृती लवकर बरी व्हावी यासाठी शुभेच्छा दिल्या आहेत. यानंतर शरद पवारांनी मोदींचे आभार मानणारं ट्विट केलं आहे.
शरद पवार यांच्या प्रकृतीची माहिती समोर आल्यानंतर राजकीय नेत्यांसह विविध क्षेत्रातील मान्यवरांनी त्यांची प्रकृती लवकर बरी होण्यासाठी प्रार्थना केली आणि सदिच्छा व्यक्त केल्या. शरद पवारांनी ट्विट करत त्या सर्वांचे आभार मानले आहेत.
पवारांचे सर्व कार्यक्रम रद्द
पित्ताशयात खडे झाल्याने शरद पवारांना बुधवारी पुन्हा रुग्णालयात दाखल करण्यात येईल आणि पुढील उपचार करण्यात येणार आहेत. दरम्यान, प्रकृतीच्या कारणामुळे शरद पवार यांचे सर्व नियोजित कार्यक्रम रद्द करण्यात आले आहेत.