શ્રમિકો શ્રદ્ધાને ઠેંસ પહોંચે તે રીતે દશામાની પ્રતિમાના છુટા ઘા કરી ટ્રકમાં ફેંકી રહ્યા હોવાનો વીડિયો વાયરલ

દશામામાં અપાર શ્રદ્ધા ધરાવનારા ભક્તોએ પૂરી શ્રદ્ધા અને ભક્તિ પૂર્વક માતાજીની પૂજા-આરાધના કરી હોય. ત્યાર પછી જ્યારે વિસર્જનનો વખત આવે ત્યારે ભીની આંખે વિદાય આપી હોય તેવા ભક્તો-શ્રદ્ધાળુઓની લાગણીને ઠેંસ પહોંચે તે રીતે દશામાની મૂર્તિના છુટા ઘા કરી ટ્રકમાં ગોઠવવામાં આવી રહી હોવાનો વીડિયો વાયરલ થયો છે. નાનપુરા ડક્કા ઓવારાનો આ વીડિયો છે. જેમાં સુરત મહાનગરપાલિકા વતી કામ કરી રહેલા શ્રમિકો માતાજીની મૂર્તિના છુટા ઘા કરતા જોવા મળે છે. વાસ્તવમાં મહાનગરપાલિકાના જે પણ કર્મચારી કે અધિકારી આ જગ્યાએ ફરજ પર હોય તેમણે લોકોની શ્રદ્ધાને ઠેંસ ન પહોંચે તે રીતે પ્રતિમાનું વિસર્જન થાય તે જોવાનું હોય છે. પણ, અહીં કોઈ અધિકારી કે કર્મચારી હાજર હોય તેવું લાગતું નથી. પરિણામે લોકોની શ્રદ્ધાને ઠેંસ પહોંચાડાઈ રહી છે. અત્રે એ ઉલ્લેખનીય છે કે દશામાની પ્રતિમાના વિસર્જન માટે સુરત મહાનગરપાલિકા તરફથી પાંચ કૃત્રિમ તળાવો બનાવવામાં આવ્યાં હતાં. એ કૃત્રિમ તળાવોમાં પ્રતિમાનું વિસર્જન કરી શકાય તે હેતુથી તાપી તટેથી પ્રતિમાં ટ્રક મારફતે કૃત્રિમ તળાવ સુધી લઈ જવાની આ કામગીરી હતી. પણ, પ્રતિમાના ઘા કરી શ્રદ્ધાળુઓની શ્રદ્ધાને ઠેંસ પહોંચે તે રીતે કામગીરી કરી હોવાથી વિવાદ ખડો થયો છે.