स्मार्ट सिटी सीईओपदी अखेर मनोहरे रूजू शिवसेना नेते, आयुक्तांच्या विरोधानंतरही सरकारचे मौन

स्मार्ट सिटी सीईओपदी अखेर मनोहरे रूजू
शिवसेना नेते, आयुक्तांच्या विरोधानंतरही सरकारचे मौन
 संभाजीनगर स्मार्ट सिटी डेव्हलपमेंट कार्पोरेशन लिमिटेंड कंपनीच्या मुख्य कार्यकारी अधिकारी (सीईओ) पदाचा सहायक संचालक बाबासाहेब मनोहरे सोमवारी दि.22 पदभार स्वीकारला. दोन दिवसांपूर्वीच त्यांनी प्रशासकीय कार्यवाही पूर्ण करत जिल्हाधिकारी व महापालिका आयुक्तांना आपण रूजू झाल्याचे पत्र पाठवले होते. पालिका प्रशासक आस्तिककुमार पांडेय यांनी त्यांची नियुक्ती चुकीची असल्याचे म्हणत ती रद्द करण्याची मागणी केली होती. तर शिवसेना नेते चंद्रकांत खैरे यांनी मनोहरे यांना पदभार घेऊ देणार नाही, असा इशारा देखील दिला होता. 
राज्य सरकारने फेब्रुवारी महिन्याच्या प्रारंभीच सहायक संचालक बाबासाहेब मनोहरे यांच्या नियुक्तीचे आदेश काढले होते. यानंतर एएससीडीसीएलचे सीईओ तथा पालिका प्रशासक पांडेय यांनी त्यांची नियुक्ती चुकीची असून ती रद्द करण्याची मागणी राज्य सरकारकडे केली होती. मात्र त्यांच्या याविषयीच्या पत्रावर राज्य सरकारकडून कुठलेच उत्तर प्राप्त झाले नाही. मात्र यामुळे आयएएस अधिकार्‍यानेच या नियुक्तीवर आक्षेप घेतल्याने त्यावेळी चांगलीच चर्चा रंगली होती. दरम्यान, मनोहरे हे उस्मानाबाद नगरपरिषदेत मुख्याधिकारी पदावर कार्यरत असताना त्यांनी लोकशाहीर आण्णाभाऊ साठे नागरी वस्ती सुधार योजनेच्या कामात अनियमितता केल्याचे आरोप निश्चित झाले आहेत. यासंबंधीचा प्रस्ताव उस्मानाबादचे जिल्हाधिकारी कौस्तुभ दिवेगावकर यांनी विभागीय आयुक्त सुनील केंद्रेकर यांना 29 जानेवारी रोजी दिला असून त्यानुसार त्यांच्याविरोधात विभागीय चौकशी प्रस्तावित केली आहे, असे सूत्रांनी सांगितले. यातच अशा वादग्रस्त अधिकार्‍यास औरंगाबादेत पदभार स्वीकारू देणार नाही, असा इशारा शिवसेना नेते चंद्रकांत खैरे यांनी दिला होता. तसेच मुख्यमंत्र्यांकडे स्मार्ट सिटीच्या सीईओ पदासाठी आयएएस दर्जाचा अधिकारी द्यावा, अशी मागणी करणार असल्याचे खैरे यांनी स्पष्ट केले होते. मात्र यावर राज्य सरकारने मौनच बाळगले.
आयुक्तांशी प्रत्यक्ष भेट झाली नाही : नियुक्तीवरून वाद सुरू असतानाच शासन आदेशानुसार सोमवारी मनोहरे शहरात दाखल झाले. सकाळी अकरा वाजता त्यांनी सीईओ पदाचा पदभार स्वीकारला. त्यानंतर दुचारी चार वाजता पालिका आयुक्त पांडेय यांची पालिका मुख्यालयात भेट घेण्याचे ठरले होते. मात्र पांडेय यांना बरे वाटत नसल्याने ते दुपारी पालिकेत आले नाही. त्यामुळे भेट होऊ शकली नाही. तसेच संचिका त्यांच्याकडे गेली आहे. मी अधिकृत रित्या गुरुवारीच पदभार घेतला असल्याने मी माझे काम सुरु केल्याचे मनोहरे यांनी सांगितले.