दत्त जयंती निमित्ताने सनातन संस्थेतर्फे जिल्ह्यात ऑनलाइन प्रवचन संपन्न !

यवतमाळ - प्रतिनिधी किरण मुक्कावार 9767271001

मार्गशीर्ष पौर्णिमेच्या दिवशी मृग नक्षत्रावर सायंकाळी दत्ताचा जन्म झाला, म्हणून त्या दिवशी दत्ताचा जन्मोत्सव सर्व दत्तक्षेत्रांत साजरा होत असतो. दत्त जयंती या दिवशी दत्ततत्त्व हे पृथ्वीतलावर नेहमीच्या तुलनेत १००० पटीने कार्यरत असते. या दिवशी दत्ताची मनोभावे नामजपादी उपासना केल्यास दत्ततत्त्वाचा अधिकाधिक लाभ मिळण्यास साहाय्य होते. दत्ताच्या पाठीमागे असलेली गाय म्हणजे पृथ्वी आणि चार श्वान म्हणजे चार वेद. औदुंबराचा वृक्ष हे दत्ताचे पूजनीय रूप आहे; कारण त्यात दत्ततत्त्व जास्त प्रमाणात असते. दत्तगुरूंनी पृथ्वीला गुरु केले आणि पृथ्वीप्रमाणे सहनशील आणि सहिष्णु असावे अशी शिकवण घेतली. तसेच अग्नीला गुरु करून, हा देह क्षणभंगूर आहे, अशी शिकवण अग्नीच्या ज्वालेपासून घेतली. अशाप्रकारे चराचरांतील प्रत्येक वस्तूमध्ये ईश्वराचे अस्तित्व पहाण्यासाठी म्हणून दत्तगुरूंनी चोवीस गुरु केले आहेत, अशी माहिती दत्तजयंती निमित्ताने सनातन संस्थेच्या वतीने जिल्ह्यात घेण्यात आलेल्या ऑनलाईन प्रवचनात सौ.ज्योती अर्धापुरकर यांनी दिली. यावेळी 'श्री गुरुदेव दत्त' या समुहिक नामजपाचे पठन करण्यात आले. याचा लाभ जिल्ह्यातील ५० जिज्ञासूंनी घेतला.