मुंबईतील मंत्रालयात काही दिवसांपूर्वी बॉम्ब ठेवल्याच्या अफवा उडाली होती. त्यानंतर आता कुलाब्यातील ताज हॉटेलमध्ये दोन मास्कधारी व्यक्ती बंदुकीसह घुसले असल्याच्या फोनने दहशतीचं वातावरण निर्माण झालं होतं. फोननंतर सुरक्षा यंत्रणा सतर्क झाल्या आणि घटनास्थळाची पाहणी करण्यास पोहोचल्या आहे. मुंबई पोलिसांचे बॉम्बशोधक आणि नाशक पथकाकडून घटनास्थळाची पाहाणी केली गेली. त्यानंतर ही अफवा असल्याचं समोर आलं आहे.
मुंबई पोलिसांनी तपासाची सूत्रं वेगाने फिरवत हा फोन कुठून आला, याचा शोध लावला. त्यानंतर एका १४ वर्षीय मुलांने हा फोन केल्याचं समोर आलं आहे. चौकशीअंती हा फोन कॉल खोटा असल्याचं स्पष्ट झालं आहे. या प्रकरणी पोलिसांनी १४ वर्षीय मुलाला ताब्यात घेतलं आहे. या घटनेबाबत त्याच्या वडिलांना काहीच माहित नसल्याचं समोर आलं आहे. मुंबई पोलीस याप्रकरणी अधिक तपास करत आहेत.
अफवा जरी असली तरी फोननंतर पोलिसांनी तात्काळ हालचाली करत संपूर्ण परिसर निर्मनुष्य केला होता. कोणताही अनुचित प्रकार घडू नये यासाठी काळजी घेतली गेली. तसेच ताज हॉटेलच्या सुरक्षेत वाढ करण्यात आली आहे.