रेणापूर : सरपंच व उपसरपंच परिषदेच्या नावाखाली रेणापूर येथे अधिकाऱ्यांची आढावा बैठक घेण्यात आली. या बैठकीत काँग्रेसचे प्रवेश करून राजकीय भाषणे झाली या बैठकीस राजकीय स्वरूप देण्यात आले होते. त्यामुळे अशा स्वरूपाच्या बैठकीस उपस्थित राहणाऱ्या प्रशासकीय अधिकारी व कर्मचाऱ्यांनी नियमांचे उल्लंघन केले असून त्यांच्यावर कार्यवाही करावी, अशी मागणी भाजपच्या वतीने जिल्हाधिकार्यांना दिलेल्या निवेदनात करण्यात आली आहे. भाजपाचे तालुकाध्यक्ष ॲड. दशरथ सरवदे यांच्यासह तालुक्यातील भाजपा पदाधिकाऱ्यांनी तहसीलदारांमार्फत जिल्हाधिकाऱ्यांना दिलेल्या या निवेदनात म्हटले आहे की, बुधवार दि.४ ऑगस्ट रोजी रेणापूर येथे स्थानिक आमदारांनी सरपंच व उपसरपंच परिषदेच्या नावाखाली आढावा बैठक घेतली. या बैठकीस सर्व विभागप्रमुख, जि.प.चे अतिरिक्त मुख्य कार्यकारी अधिकारी, उपविभागीय अधिकारी, तहसीलदार, गटविकास अधिकारी, ग्रामसेवक, तलाठी, कृषी सहाय्यक, नगरपंचायतचे मुख्याधिकारी आदी अधिकारी व कर्मचारी उपस्थित होते. या बैठकीच्या व्यासपीठावर लावण्यात आलेल्या फलकावर काँग्रेस-राष्ट्रवादी काँग्रेस व शिवसेनेच्या नेत्यांची छायाचित्रे होती. प्रशासकीय आढावा बैठक असताना काँग्रेस पक्षाचे पुढारी, चेअरमन व इतर अनेक जण व्यासपीठावर बसलेले होते. या बैठकीत राजकीय भाषणे झाली तसेच पक्ष प्रवेशाचे कार्यक्रमही घेण्यात आले. यावरून ही आढावा बैठक होती की राजकीय मेळावा असा प्रश्न निर्माण होत आहे एकूणच काँग्रेस पुढाऱ्यांनी आढावा बैठकीत आपली राजकीय पोळी भाजून घेण्याचा प्रकार केला आहे. अशा राजकीय स्वरूपाच्या कार्यक्रमास प्रशासकीय अधिकाऱ्यांनी उपस्थिती का दर्शवली ? आढावा बैठकीत राष्ट्रीय कार्यक्रम करण्यास पाठिंबा कशासाठी दिला? कुठल्या शासन निर्णयाच्या आधारे प्रशासनाने हा कार्यक्रम राबवला ? असे प्रश्न या निवेदनात उपस्थित करण्यात आले आहेत. सत्तेचा दुरुपयोग करण्याचा हा प्रकार असून भाजपाच्या वतीने या कार्यक्रमाचा निषेध करण्यात आला आहे. या कार्यक्रमास उपस्थित राहणाऱ्या अधिकाऱ्यांनी आपल्या पदाचा दुरुपयोग केला असून अशा अधिकाऱ्यांवर कार्यवाही करावी, अन्यथा भाजपाच्या वतीने न्यायालयीन न्यायालयात दाद मागण्यात येईल असा इशाराही या निवेदनात देण्यात आला आहे.
या निवेदनावर ॲड.दशरथ सरवदे यांच्यासह पक्षाचे लातूर ग्रामीण विधानसभा अध्यक्ष अनिल भिसे, मराठवाडा ओबीसी प्रमुख डॉ. बाबासाहेब घुले, पंचायत समितीचे सभापती रमेश सोनवणे, उपसभापती अनंत चव्हाण, रेणापुरचे उपनगराध्यक्ष अभिषेक आकनगिरे, सरपंच संघटनेचे तालुकाध्यक्ष शरद दरेकर, नगरसेवक उज्वल कांबळे, पंचायत समिती सदस्या सौ.चंद्रकला इंगोले, चंचनाबाई घुले, बायनाबाई साळवे यांच्यासह नगरसेविका सुरेखा चव्हाण, विजय चव्हाण, सुमन मोटेगावकर, राजेश घोडके, संतोष चव्हाण, किसन क्षीरसागर, प्रविण शिंदे, प्रशांत डोंगरे, विजय गंभीरे, महेंद्र पाटील, राज जाधव, नवनाथ माने, धनंजय पवार, पाटलोबा मुंडे, गोविंदराव सूर्यवंशी, सौदागर कुंभार, उद्धव घोडके, ज्ञानेश्वर घोडके, विठ्ठलराव कसपटे, दत्ता सरवदे, सुभाष पवार, केशरबाई राठोड व असंख्य पदाधिकाऱ्यांच्या स्वाक्षऱ्या आहेत.