Purana rusi ball para khili kena london olympic tak pura duniya ke choka diya Dr. Talimeren Ao India laga pohila National football captain aru desh laga pohila flag bearer ase 1948 london olympic teh. Aji 13 september 2020 tai laga 22 sal death anniversary teh pura desh tai ke yad kuria ase. Tai para pura desh ke hosla jatayishie football teh pura josh di kena khiladi howole. Dr.Talimeren Ao Nagaland para ahia football legend ekta ase. Tai laga down to earth personality aru football pasan karne football duniya teh tai ke pasan kuria manu bishi ase. Tai khali theen para footbal khili-e aru naga manu bitor teh sopse mashur jana-a manu ekta bhi ase.
1918 teh Nagaland laga changki bosti Mokokchung district para jonom huishie. Tai laga football junon bacha samoy para shuru huishie. Hoilewi facilities bhal nathakia karne tai rusi para nijor laga ball banayi kena aru santula phol khan luyi kena khili thake kuishie. Aru juta bhi nathakia karne baccha samoy teh khali theen para hi khili-e. Tai 1948 sal teh MBBS laga ekta sal balidan di kena london olympic teh indian football captain kuri kena jayishie. Final match teh France logo 2-1 para harishie huilewi sop manu ke chokayi kena rakhi dishie. Kile tai khan khali theen para josh di kena khilia karne.
Tai laga baba tai ke doctor banayi kena gorib manu khan ke modut kuwiwole icha thakia karne tai 1950 sal teh MBBS degree khotom kuri kena Dibhugarh medical college teh registrar post para joined kurishie. Eneka huiyi kena tai naga manu bitor teh sopse pohila health service director bhi kurishie.
Tai service joined huwa pichie bhi football laga junun tuh kitia bhi khotom hoanayi. Local bacha khan ke encouraged kuri kena medical football team khan bhi organised kuri thake. Aru local tournament khan teh pura mon di kena part bhi luyi.
Dr.Talimeren Ao 1998 sal teh murishie huilewi tai laga pichie yaadh kuriwole laga bishie moi khan karne chari kena jayishie. Aji laga din tuh tai ke yaadh kuria laga samoy aru tai ke shadhanjali diwole laga din ekta ase.
India laga sopse pohila football hero Dr. Talimeren Ao laga services khali football tehe nahoi kena community service karne pura desh tai ke yaadh kuria ase. Dr. Talimeren Ao laga legacy tai muria pishie tebhi yaadh kurie. 2001 sal teh Mohan Bagun Athletic Club para tai ke Mohari Rama Awards bhi dishie.
Dr. talimeren Ao laga jiven tuh ami khan ke ekta prerna diya ekla nahoi kena, ekjun ekjun ke sahaita kuriwole aru desh laga seva kuriwole laga kam teh kineka mon diwo lage ituh ami khan sopke sikhayishie.