नंदुरबार, दि. 23 : हत्ती रोगाच्या दुरीकरणासाठी हत्ती रोग संक्रमण पडताळणी सर्वेक्षण नवापूर तालुक्यातील निश्चित केलेल्या गावांमध्ये 27 ते 30 सप्टेंबर 2021 या कालावधीत आरोग्य विभागातर्फे राबविण्यात येणार आहे.
या सर्वेक्षणासाठी तालुक्यातील शासकीय निकषांनुसार निवडलेल्या 43 गावांतील 6 ते 7 वर्षे वयोगटातील 1 हजार 540 व्यक्तींचे रक्त नमुना तपासणी करण्यात येणार आहे. हत्तीरोग हा बुचेरेरिया बॅनक्रॉफ्टी या परोजपजीवी जंतूमुळे होणारा आजार आहे. या आजाराचा प्रसार क्यूलेक्स प्रकारच्या डासामुळे होतो. दूषित डास मानवाला चावा घेताना हत्ती रोगाचे जंतू निरोगी व्यक्तीच्या शरीरात प्रवेश करतात. आरोग्य विभागामार्फत सर्वेक्षणासाठी तालुकास्तरावर प्रशिक्षण देण्यात आले असून जनजागृतीही करण्यात येत आहे. ही मोहीम यशस्विरीत्या राबविण्यासाठी सहकार्य करण्याचे आवाहन जिल्हा आरोग्य अधिकारी डॉ. महेंद्र चव्हाण यांनी केले आहे.
नंदुरबार जिल्हा प्रतिनिधी - केतन रघुवंशी मो. 8421732333 / 9637732333