पाझर तलावात बुडून एकाचा मृत्यू मोठे कडवान येथील घटना

विसरवाडी - नवापूर तालुक्यातील मोठे कडवान येथील पाझर तलावात बुडून एकाचा मृत्यू झाल्याची घटना रविवारी सायंकाळी घडली आहे.

याबाबत अधिक माहिती अशी की, मोठे कडवान येथील अर्जुन वाघीरे (वय ५५) हे ७ ऑगस्ट रोजी रविवारी सायंकाळी गावातील पाझर तलावात आंघोळीसाठी गेले असता ते पाण्यात बुडाल्याने गावकऱ्यांनी त्यांना शोधण्याचा प्रयत्न केला परंतु ते मिळून आले नाही.दरम्यान ८ ऑगस्ट रोजी सोमवारी सकाळी त्याचा मृतदेह पाण्यावर तरंगताना मिळून आला.सदर घटनेची माहिती मिळताच विसरवाडी पोलिस ठाण्याचे सहायक पोलिस निरीक्षक नरेंद्र वळवी,पोना राजु कोकणी, देवेंद्र अहिरे यांनी ग्रामस्थांच्या मदतीने मृतदेह पाण्याबाहेर काढून पंचनामा केला.याप्रकरणी मयताचा मुलगा मुलामजी अर्जुन वाघिरे यांनी दिलेल्या खबरीवरुन विसरवाडी पोलिस ठाण्यात अकस्मात मृत्यूची नोंद करण्यात आली आहे.