जिल्ह्यात ५९ मद्यपी वाहनचालकांवर गुन्हे नंदुरबार जिल्हा पोलिसांची धडक मोहीम

नंदुरबार- जिल्हा पोलिस दलातर्फे दारु पिऊन वाहन चालविणाऱ्या वाहनचालकांविरुध्द धडक मोहीम राबविण्यात आली.याअंतर्गत ५५२ वाहनांची तपासणी करण्यात आली.तपासणीत दारु पिऊन वाहन चालविणाऱ्या ५९ वाहनचालकांवर पोलिसांनी गुन्हे दाखल केले आहेत.

नाशिक परिक्षेत्राचे विशेष पोलिस महानिरीक्षक डॉ बी.जी.शेखर पाटील यांनी रस्ते अपघात गुन्हे आढावा बैठकीत दारु पिऊन वाहन चालविणाऱ्या वाहनचालकांविरुध्द कारवाई करण्याच्या सूचना पोलिसांना दिल्या. त्या अनुषंगाने जिल्हा पोलिस अधीक्षक पी.आर.पाटील यांनी नंदुरबार जिल्ह्यात दि.१८ जुन रोजी रात्री ८ ते ११ वाजेदरम्यान विशेष मोहीम राबवुन २० ठिकाणी नाकाबंदी करून ५५२ वाहनांची तपासणी केली असता त्यात ५९ वाहनचालक दारु पिऊन वाहन चालवताना मिळुन आले.याप्रकरणी विविध पोलिस ठाण्यात गुन्हे दाखल करण्यात आले आहेत.सदर कारवाई पोलिस अधीक्षक पी.आर.पाटील,अपर पोलिस अधीक्षक विजय पवार यांच्या मार्गदर्शनाखाली नंदुरबार उपविभागीय अधिकारी सचिन हिरे,शहादा उपविभागीय अधिकारी श्रीकांत घुमरे, अक्कलकुवा उपविभागीय अधिकारी संभाजी सावंत, स्थानिक गुन्हे अन्वेषण शाखेचे पोलिस निरीक्षक रवींद्र कळमकर, सपोनि संदिप पाटील यांच्या सह सर्व पोलिस ठाण्याचे पोलिस अधिकारी व १५ दुय्यम अधिकारी तसेच १०७ पोलिस कर्मचारी यांच्या पथकाने केली.