नागपूर: मंदिरांचे प्रश्न सोडवण्यासाठी मंदिरांनी संघटित होण्याची नितांत आवश्यकता आहे. आणि यासाठी विश्व हिंदू परिषदेचे मंदिर आयाम जोर करसपणे प्रयत्न करीत आहे, अशी माहिती विश्व हिंदू परिषदेचे क्षेत्र संपर्कप्रमुख श्री अनिल सांबरे यांनी यावेळी दिली. नागपूर महानगरातील मोहिते भागातील मंदिर विश्वस्तांची बैठक २३ जूनला जलाराम बाप्पा मंदिर सभागृहात पार पडली. त्यावेळी ते बोलत होते.
ज्या - ज्या ठिकाणी हिंदू समाज कमी झाला त्या त्या ठिकाणी मंदिरांची दुरावस्था झाली, याच्याकडे लक्ष वेधून मंदिरांनी अधिकाधिक समाजाभिमुख होऊन समाजाचे धार्मिक नेतृत्व करावे, असे आवाहन त्यांनी केले. मंदिरांच्या विविध प्रश्नांसाठी विश्वस्तांचे प्रशिक्षण करणे, त्यांच्यासाठी तज्ञांची आधार समिती उपलब्ध करून देणे, या दृष्टीने आयाम प्रयत्नशील आहे असे ते म्हणाले.
नागपूरमध्ये सर्व भागांमध्ये मंदिर विश्वस्तांच्या बैठकी मंदिर आयामाच्या वतीने आयोजित केल्या जात आहेत. आतापर्यंत एकूण ८ बैठकी संपन्न झाल्या. देशभर मंदिरांची व्यवस्थित रचना, संघटन उभे करण्याचा प्रयत्न विश्व हिंदू परिषदेच्या मंदिर एवं अर्चक पुरोहित आयामाच्या वतीने सुरू आहे.