Achanak para Government of India aru Assam government bitor tehh phasla kurikena karbi–anglong tehh shuita rebel groups logo peace deal sign kuri kena Karbi-anglong area ke ekta autonomous territorial council banawole koshish kuria tuh NSCN-IM, Rengma Hoho, Rengma Naga people council karbi anglong, aru NFS, para strongly opposed kurishie.
NSCN-IM para jo-a kali porson teh kuishie naga manu laga mati ke alak kuri wole nadiwo koi kena gusa hui kena ase aru eneka kam tuh hoile indo-naga political lamba kotha kuri kena ahi thakia ke kamjor kuria nishina ase kuishei.
NSCN-IM para press release teh janayi dishie, northeast region bitor teh sopse dangor conflict tuh mati divide kuria laga jamla ase. Especially Assam aru Nagaland bitor the bhi…bishi lamba samoy para ekta dangor jamla ase…NSCN-IM group para kuishie, karbi anglong autonomous council bonawole laga koshish tuh shuyita rebel groups:
1. Karbi Longri North Cachar Hills Liberation Front
2. People’s Democratic Council of Karbi Longri
3. United People’s Liberation Army
aru tinta Karbi People’s Liberation Tiger faction ke Khushi kuri wole laga koshish babna ekta ase.
Karbi-Anglong area ke ekta Autonomous Territorial Council banawole laga koshish tuh janiya pishie Assam tehh thakia Rengma Naga Peoples Council khan bhi Rengma Hills ke karbi anglong para alak kuri kena autonomous district kuriwole manyi-a ase. Etuh ekla nahoi kena Rengma Naga Peoples Council karne MLA seat bhi reserved diwole mangia ase.
Memorandum Union home minister Amit Shah ke di kena kuishie, Rengma naga manu khan shuru samoy para karbi-anglong tehh buhi kena ahia ase. Purana zamana british rule laga samoy para Ahoms aru Rengma Naga khan dada-bhai nishina eki logo teh thake. 1963 sal tehh Nagaland state banayi samoy Rengma hills ke bhi partition huishie. Aru Rengma Nagas khan bishi deri samoy para autonomous district council mangi kena ahia ase huilewi government para etia tak tai khan laga demands tuh huniya nai.
Aru achanak para central government aru Assam government bitor phasla kurikena peace deal sign kuriwole koshish the asli nivasi naga manu laga sehamati naluyi kena kotha khotom kuriwole koshis kuria tuh Naga Student Federation para namaniwo koi kena press release tehh koishie. NSF president Mr. Kegwayhun Tep aru General secretary Shiipuni duijun para press release tehh koishie, eneka matlabi koshish tuh kitia bhi swikar nakuriwo kuishie. Kintu enaka kam tuh naga manu ke divide kuria laga kam ase.
Aruwi kuishie, naga manu laga awas ke dabawole koshish aru eneka peace deal kotha baji tehh ekbar bhi asli navasi naga khan laga manjuri naluwa tuh bishi mon bikha-a laga kotha huishie.
NSF federation para karbi–anglong the thakia naga manu khan ke etuh propose deal laga signing ceremonies nahoi lewi komwi program the hisa naluwi koi kena janayi dishie.
Agee bhi naga manu laga bhal aru mahima karne pura mon di kena kam kuri thakiwo kuishie, NSF para.