कोल्हापूर: छत्रपती संभाजीनगर येथील पुरातत्व रसायनतज्ञ विभाग यांनी १२ आणि १३ एप्रिलला पहाणी करून १४ आणि १५ एप्रिलला श्री महालक्ष्मीदेवीच्या मूर्तीचे संवर्धन केले. ही संवर्धन प्रक्रिया पुरातत्व रसायनतज्ञ विभागाचे उपअधीक्षक डॉ. एस्. विनोदकुमार, वरिष्ठ प्रतिमाकार सुधीर वाघ, प्रतिमाकार मनोज सोनवणे यांनी पूर्ण केली.
संवर्धनामुळे दोन दिवस बंद असलेले दर्शन भाविकांना १६ एप्रिलपासून पूर्ववत खुले करण्यात आले आहे. तत्पूर्वी सकाळी धार्मिक विधी पूर्ण करण्यात आले. श्री महालक्ष्मीदेवीचे दर्शन पूर्ववत झाल्याने भाविकांनी समाधान व्यक्त केले.