पोलिस कोठडीत आरोपीचा जबर मारहाणीमुळे मृत्यू; पोलिस निरीक्षकासह पाच जणांविरोधात खुनाचा गुन्हा

गोंदिया:आमगाव पोलिस स्टेशनमध्ये आरोपीच्या कोठडी मृत्यूप्रकरणात पोलिस निरीक्षकासह पाच जणांविरूद्ध गुरुवारी खुनाचा गुन्हा दाखल करण्यात आला. पोलिस निरीक्षक सुभाष चौहान, हवालदार खेमराज खोब्रागडे, अरूण उके, दत्तात्रय कांबळे यांच्यावर गुन्हा दाखल करून त्यांना अटक करण्यात आली आहे. सहाय्यक पोलिस निरीक्षक महावीर जाधव फरार झाला आहे. शुक्रवारी आरोपींना न्यायालयात हजर करण्यात आले असून त्यांची पोलिस कोठडीत रवानगी करण्यात आली.

आमगावच्या कुंभारटोली परिसरातील आरोपी राजकुमार अभयकुमार धोती, सुरेश धनराज राऊत, राजकुमार गोपिचंद मरकाम व एका अल्पवयीन आरोपीला स्थानिक गुन्हे शाखेने २० मे रोजी अटक केली होती. २१ मे रोजी स्थानिक गुन्हे शाखेने आमगाव पोलिस स्टेशनला हे आरोपी हस्तांतरीत केले. २२ मे रोजी पहाटेच्या सुमारास यातील राजकुमार अभयकुमार धोती याचा कोठडीत संशयास्पद मृत्यू झाला होता. याप्रकरणात अक्षम्य दुर्लक्षाचा ठपका ठेवीत चौघांना निलंबितही करण्यात आले होते. त्यानंतर प्रकरणाची चौकशी करून पाच जणांविरूद्ध गुरुवारी खुनाचा गुन्हा दाखल करण्यात आला. सदर प्रकरणाचा तपास राज्य गुप्तचर विभागाचे अधिक्षक राजलक्ष्मी शिवणकर, निरीक्षक चंद्रकांत सूर्यवंशी करीत आहेत.