અમદાવાદના શિવરંજની પાસે આવેલ કે.સી. હોલીડેના માલિક માત્ર રૂ. ૪૦ હજારમાં દુબઇ અને રૂ. ૭૦ હજારમાં સિંગાપુર ફરવા માટેની સ્કીમમાં અંદાજે ૧૫૦૦ લોકોને ૧૨ થી ૧૫ કરોડનો ચૂનો લગાવીને ક્યાંક નાસી ગયો છે. ફરવાના શોખીનોને દિવાળી ટાણે અધવચ્ચે ફસાઈ ગયા છે અને ફરવા માટે ચૂકવેલ નાણાં માટે હાથ ધોઈ નાખવાનો વારો આવ્યો છે.
બાબત એમ છે કે શહેરના પોશ સેટેલાઇટ વિસ્તારમાં આવેલ શીવરંજની ચાર રસ્તા પાસેના ઇસ્કોન સેન્ટરના ચોથા માળે આવેલી કે.સી હોલીડેના માલિકે લોકોને સસ્તા પેકેજમાં દુબઇ તેમજ સિંગાપુર મોકલવાના બહાને 12થી 15 કરોડ રૂપિયાનુ ફુલેકુ ફેરવ્યુ હોવાની ચર્ચા ચાલી રહી છે.
લોકો પાસેથી કેશમાં દુબઇની ટુરમાં બુકીંગના નામે કિરણસિંહ ચૌહાણ નામના શખ્સે પૈસા ઉઘરાવી લીધા હતા. કસ્ટમરને કોઈ પ્રૂફ ન મળે તે રીતે પ્રવાસીને સસ્તી ટુર ઓફર કરીને પૈસા ઘર ભેગા કરીને હાલમાં 23 સપ્ટેમ્બરથી બધા પ્રવાસી દુબઇમાં ફ્સાયા છે, ત્યાં ગયેલા પ્રવાસીઓએ ત્યાં અલગથી વધારાના પૈસા ખર્ચીને ફરવાની નોબત આવી છે.
તારીખ 24 સેપ્ટેમ્બરથી પ્રવાસી જઈ શક્યા નથી તેમની ટિકિટ બુક થયેલ હોવા છતાં વિઝા ન આવવાથી જઈ શક્યા નહોવાનુ જાણવા મળેલ છે. આ ઉપરાંત વર્ષ 2023ના એપ્રિલથી સેપ્ટેમ્બર મહિનામાં ટુરના નામે એડવાન્સ બુકીંગના નામે વ્યક્તિદીઠ ફ્ક્ત રૂ. ૩૭૯૦૦/- ઉઘરાવી સંચાલક ફરાર થઇ ગયો છે.
છેતરપિંડીનો ભોગ બનેલા પરેશ પરમાર નામના વ્યક્તિએ આ બાબતની અરજી સેટેલાઇટ પોલીસ સ્ટેશનમાં નોંધાવી ત્યારે સમગ્ર કૌભાંડનો ભાંડો ફૂટ્યો. આશરે 1500 જેટલા પ્રવાસી સાથે છેતરપિંડી આચરીને કે.સી હોલીડેનો માલિક કિરણસિંહ ચૌહાણ અને સ્ટાફ તેની ઓફિસે તાળા મારીને ફરાર થઇ ગયા છે. જેના કારણે લોકોના ટોળે-ટોળા ઉમટી પડયા હતા.
ઘણા પ્રવાસીઓ તો દુબઇ પહોચી ગયા બાદ તેમને હોટલોમાં કે પરત આવવા માટે ફલાઇટનુ બુકીંગ પણ કર્યુ ન હોવાનુ બહાર આવ્યુ છે. તેમજ અટવાયેલા લોકોના ફોન પણ ઠગ ન ઉપાડતાં આખરે લોકોએ ઓનલાઇન ભારતમાંથી પૈસા મંગાવવાનો વારો આવ્યો હતો.